Nakat-on sa mga proseso ug rekisitos sa legal nga adoption ug foster care ang mga prospective ug adoptive parents nga mitambong sa Pre-Adoption Forum ug Foster Care Orientation nga gipahigayon sa City Government of Dipolog pinaagi sa City Social Welfare and Development Office (CSWDO) niadtong Hunyo 24.
Ang forum, nga gipangulohan sa National Authority for Child Care (NACC) pinaagi sa Regional Alternative Child Care Office (RACCO) Region 9, nagtumong sa paghatag og husto ug komprehensibong impormasyon sa mga partisipante sa dili pa sila mosulod sa proseso sa adoption ug alternative child care.
Gipresentar sa mga resource speakers ang mga probisyon sa Simulation Birth Rectification Act (RA 11222), ang proseso ug mga rekisitos sa legal nga adoption, ingon man ang mga kinahanglanon aron mahimong foster parent. Nagpahigayon usab og open forum aron matubag ang mga pangutana ug kabalaka sa mga partisipante.
Sa pagtapos sa kalihokan, gidunolan og Certificate of Attendance ang mga partisipante isip usa sa mga rekisitos sa pag-file sa adoption petition ug pag-aplay alang sa foster family care license.(IKEN B. GULLEM)
Source: Dipolog City Social Welfare and Development Office