ZAMBOANGA DEL NORTE — Naghiusa ang Department of Environment and Natural Resources (DENR) pinaagi sa PENRO Zamboanga del Norte sa usa ka courtesy visit ug konsultasyon kauban ang ChildFund Philippines ug Congressman Jose Manuel Alba, First District Representative sa Bukidnon, aron mapalambo ang implementasyon sa Project TRANSFORM sa probinsya.
Gipunting sa panagtigum ang pagpauswag sa sustainable development ug nature-based solutions, ilabi na sa pagpalig-on sa industriya sa kawayan isip alternatibong low-carbon nga materyales alang sa konstruksyon ug panginabuhian.
Uban sa XAES Foundation Inc. pinaagi sa Climate CARE nga gisuportahan sa European Union Philippines, ug mga kaabag nga Bamboo Integrated Works Inc. ug Tinaplan Bamboo Planters Inc., nagbuhat og benchmarking visits ang mga stakeholder sa pipila ka pasilidad sa industriya. Gisusi ang operasyon sa Homebiz Bambutek ug NUMAT Engineered Bamboo Facility aron ma-evaluate ang production process, kapasidad sa engineered bamboo, ug panginahanglan sa treated bamboo splits ug mga makina para sa umaabot nga Shared Service Facilities.
Tumong sa inisyatiba nga mapalig-on ang papel sa kawayan isip climate-resilient nga industriyal nga materyales, samtang nagmugna og dugang oportunidad sa panginabuhian ug nagpalambo sa inklusibong pagtubo nga may pag-atiman sa kalikupan.(JENIFFER JR. DELICA)
Source: DENR Zamboanga Peninsula