Girombo sa duha ka armadong lalaki nga nagpa-ilang miyembro sa PDEA ang usa ka balay sa Purok Bangus, Dapitan City, Zamboanga del Norte, pasado alas dose sa udto Pebrero 25, 2026, ug nakalimas og kwarta ug mga alahas nga gibana-banang mokabat og sobra duha ka milyon ka piso.
Sumala sa imbestigasyon, kalit misulod ang mga suspek nga naka-facemask ug nagpakita og armas, hinungdan nga wala makalihok ang pito ka tawo sulod sa balay. Gipanggapos sila gamit og plastic straw ug gipahapa, gawas sa usa ka tiguwang nga dili na makalakaw maong wala na gaposa.
Gidala sa mga suspek ang kwarta ug mga alahas nga gipanag-iya ni Regie Realiza Pastrano, usa ka negosyante nga mitambong lamang unta sa balay sa iyang inahan alang sa personal nga lakaw. Matod pa sa usa sa mga tagbalay, ang kwarta ra ni Pastrano ang klarong gitarget sa mga tulisan atol sa hitabo.
Sa pahayag ni PLTCol Eva Joy Capurcos, adunay tulo ka person of interest nga karon gimonitor sa kapulisan human makit-ang misakay og itom nga minivan paikyas gikan sa lugar, samtang padayon ang hot pursuit operation aron mailhan ug madakpan ang mga responsable.(JENIFFER JR. DELICA)
Source: Zanorte News Flash