Usa ka Grade 11 scholar sa Philippine Science High School – Zamboanga Peninsula Region Campus (PSHS-ZRC) ang nakadaog og Bronze Award sa International Science Olympiad Competition of Southeast Asia (ISOCSEA) nga gipahigayon sa Osaka, Japan niadtong Disyembre 19–22, 2025, ang giasidunggan ni Congressman Roberto “Pinpin” Uy Jr. sa iyang nakab-ot nga kadaugan.
Si Freya Johnea R. Pelias, lumad sa Dapitan City, mipasundayag og kahusayan batok sa mga partisipante gikan sa nagkalain-laing nasod sa Southeast Asia. Bisan nagsabay ang iyang pagpangandam sa kompetisyon ug ang academic requirements sa eskwelahan, napadayon niya ang disiplina ug pokus sa pagbansay.
Sumala sa eskwelahan, ang kadaugan ni Pelias nagpakita sa kalidad sa STEM education sa rehiyon ug sa abilidad sa mga estudyante sa probinsya nga makigsabayan sa internasyonal nga lebel.
Ang iyang kalampusan karon gihulagway isip inspirasyon sa ubang kabatan-onan nga nagtinguha usab nga makalabang sa utlanan pinaagi sa edukasyon ug siyensya.(IKEN B. GULLEM)
Source: Zamboanga del Norte Provincial News Network