Pormal nang gilusad ang Project Transform sa lalawigan sa Zamboanga del Norte human gipirmahan ni Governor Darel Dexter T. Uy ug ni Department of Environment and Natural Resources (DENR) Secretary Raphael P.M. Lotilla ang Memorandum of Agreement (MOA) sa seremonyang gipahigayon niadtong Hulyo 23, 2025.
Ang Project TRANSFORM o Transdisciplinary Approach for Resilience and Sustainability through Multistakeholder Engagement usa ka inisyatibo nga gipangulohan sa DENR nga nagtumong sa pagpalig-on sa kahimsog sa kalikupan ug pagpausbaw sa kahimtang sa mga komunidad nga apektado sa mga katalagman ug epekto sa klima.
Pinaagi sa paghiusa sa syensya, teknolohiya, ug lokal nga kahibalo, mutabang ang proyekto sa mga lokal nga panggamhanan sa paghimo og epektibong plano ug aksyon alang sa kaluwasan ug malungtarong kauswagan sa ilang mga komunidad.
Gisuportahan kini sa mga sektor gikan sa pribadong negosyo, civil society, akademya, ug katawhan —usa ka tinipong paningkamot nga gitawag og “whole-of-society approach” nga gibase sa ebidensya aron magiyahan ang mga desisyon ug lokal nga pamuhunan.
Ang maong seremonya gisaksihan nila DENR Region IX OIC Regional Executive Director Arturo E. Fadriquela, Zamboanga del Norte PENRO Cidur Julsadjiri, Manukan CENRO Eugene Celi, ug uban pang mga opisyal sa DENR.
Ang pagpanguna sa Project TRANSFORM nagpamatuod sa seryosong paningkamot sa lalawigan sa pagpangandam batok sa mga kalamidad, ug sa paghimo og mga palisiya nga mosuporta sa malungtarong kalamboan sa kalibotanong palibot.(Jumalisa Papa)
Source: DENR ZAMPEN