Sa padayon nga paningkamot sa pagpatuman sa inklusibong serbisyo publiko, gilusad sa Kagamhanan sa Dakbayan sa Dapitan ang usa ka inisyatibo nga nagtumong sa paghatag og quarterly honorarium sa mga Persons with Disabilities (PWD) nga mga presidente sa matag barangay, gipahigayon ang kalihokan sa Dapitan City Cultural Center niadtong Hulyo 22, 2025.
Gihatagan og bili ni Dapitan City Mayor Evelyn T. Uy ang maong inisyatibo pinaagi sa iyang inspirational message, diin iyang giila ang papel sa PWD leaders ug ang katuyoan sa programa nga suportahan ang ilang padayon nga serbisyo sa komunidad.
Ang programa nga gipasiugdahan sa City Social Welfare and Development Office (CSWDO) ug Persons with Disability Affairs Office (PDAO), gipahigayon atol sa selebrasyon sa ika-47 nga National Disability Rights Week ubos sa temang “Innovation for Inclusion: Building Inclusive Communities Together.”
Kini ang unang higayon nga ipatuman ang maong inisyatibo sa dakbayan, diin kapin sa 50 ka PWD presidents ang makadawat og ₱500 kada quarter, nga katumbas sa ₱2,000 matag tuig. Ang kabuuang pondo nga ₱100,000 kuhaon gikan sa General Fund sa lokal nga kagamhanan.
Gilauman nga pinaagi sa maong programa, mas mapasig-uli ang importansya sa papel sa mga PWD leaders sa barangay level ug ilang kontribusyon sa kalambuan sa komunidad.
Gipahigayon usab sa maong kalihokan ang talent showcase ug Disability Awareness Games, diin gihatagan og higayon ang mga PWD nga ipakita ang ilang talento, kahanas, ug panaghiusa.
Ang implementasyon sa quarterly honorarium alang sa mga PWD president usa lamang sa mga pamaagi sa lokal nga kagamhanan sa paghatag og patas nga oportunidad ug pagtagad sa tanang sektor sa katilingban, ilabi na ang mga may kapansanan.(Jumalisa Papa)
Source: ZNPNN