Gihisgutan sa City Nutrition Division ug mga Barangay Nutrition Scholars (BNS) sa Dapitan City ang mga prayoridad nga programa sa nutrisyon atol sa ilang ikaduhang quarter meeting niadtong Hunyo 18 sa Government Center Amphitheater.
Lakip sa mga gihisgutan ang resulta sa 2026 Electronic Operation Timbang Plus (eOPT) aron masuta ang kasamtangang kahimtang sa nutrisyon sa siyudad ug matino ang mga barangay nga nagkinahanglan og dugang interbensyon. Girepaso usab ang mga accomplishment report sa mga BNS ug gipalig-on ang kampanya sa exclusive breastfeeding sa matag barangay.
Gipangandaman usab sa mga partisipante ang selebrasyon sa 52nd Nutrition Month karong Hulyo pinaagi sa pagplano sa mga kalihokan nga nagtumong sa pagpalambo sa hustong nutrisyon ug himsog nga panginabuhi sa komunidad. Gihisgutan usab ang pagpangandam alang sa umaabot nga Monitoring and Evaluation of Local Level Plan Implementation Pro (MELLPI Pro).
Sumala sa City Nutrition Division, ang maong miting kabahin sa padayon nga pagpalig-on sa implementasyon sa mga programa sa nutrisyon ug pagtinabangay sa mga Barangay Nutrition Scholars aron mas mapauswag ang kahimtang sa panglawas sa mga Dapitanon.(IKEN B. GULLEM)
Source: Dapitan City Government