Gipaspasan sa Department of Agrarian Reform (DAR) Zamboanga del Norte ang pagpangandam alang sa umaabot nga field survey pinaagi sa pagpatigom sa mga Municipal Agrarian Reform Program Officers (MARPOs) aron hisgutan ang kahimtang sa mga community dialogues o pulong-pulong nga gipahigayon sa nagkadaiyang lungsod sa probinsiya.
Gipangulohan ni Provincial Agrarian Reform Program Officer (PARPO) II Daisy Dell Suan Digamon ug MARPOA President Anjannette V. Nemiaga ang miting diin girepaso ang padayon nga reorganisasyon ug pagpalig-on sa mga Barangay Agrarian Reform Committees (BARCs) aron masiguro ang aktibong partisipasyon sa mga barangay sa implementasyon sa mga programa sa agrarian reform.
Gihisgutan usab ang mga preparasyon alang sa umaabot nga field survey nga nagtumong sa pagtigom sa tukmang datos, pag-validate sa mga isyu sa komunidad, ug pagpalig-on sa partisipasyon sa mga benepisyaryo sa agrarian reform sa lebel sa barangay.
Sumala sa DAR Zamboanga del Norte, ang maong mga kalihokan kabahin sa padayon nga paningkamot sa ahensya aron mapalambo ang implementasyon sa mga programa ug serbisyo alang sa mga Agrarian Reform Beneficiaries (ARBs) sa probinsiya.(IKEN B. GULLEM)
Source: DAR Zamboanga del Norte Province