DIPOLOG CITY — Naghiusa ang probinsyal ug siyudadnong pangagamhanan sa paghatod og water equipment, sports gear, ug musical instruments ngadto sa Selinog Integrated School sa Selinog Island isip tabang sa mga hilit o lisud maabot nga eskwelahan sa Zamboanga del Norte.
Gipangulohan ang kalihokan ni Dr. Benson D. Panaguiton, OIC sa Provincial Health Office, nga nagrepresentar kang Gobernador Darel Dexter T. Uy, uban ni Atty. Bryne Angelo Brillantes, OIC sa City Legal Office sa Dapitan City, nga nagrepresentar kang Mayor Evelyn T. Uy. Ang maong buluhaton kabahin sa Healthy Learning Institution Program sa Department of Health ug Department of Education.
Gidawat sa school principal nga si Ms. Kristine Pon ang mga kagamitan nga gilauman makatabang sa pagpaayo sa kahimsog, kalimpyo, ug holistikong kalamboan sa mga tinun-an. Samtang ang Pamansalan Elementary School sa Barangay Diwan nakadawat usab og sports ug musical instruments pinaagi sa kooperasyon sa barangay nga gipangulohan ni Hon. Rosebeth Turno ug sa City Government of Dipolog sa ilawom ni Mayor Roberto Y. Uy.
Kini nga panaghiusa nagpakita sa lig-ong paningkamot sa lokal nga pangagamhanan sa paghatag og patas nga kahigayunan sa edukasyon, ilabina sa mga eskwelahan nga anaa sa hilit ug lisod duolon nga mga lugar.(JENIFFER JR. DELICA)
Source: Zamboanga del Norte Provincial News Network