Nakab-ot sa Probinsya sa Zamboanga del Norte ang nasudnong pag-ila human kini maapil sa mga nominado sa 51st Gawad Saka National Search 2026 tungod sa malampusong pagpatuman sa Kadiwa ng Pangulo (KNP).
Kini nga nominasyon nagtimaan sa epektibong pagpalihok sa programa nga nagtugot sa diretsong pagbaligya sa mga produkto sa mag-uuma, nga nakatabang sa pagpaubos sa presyo ug pagdugang sa kita sa lokal nga sektor sa agrikultura.
Sumala ni Acting Provincial Agriculturist Armie Bergado, 10 ka entries ang gisumite sa probinsya, diin 8 ang midaog sa regional level ug 2 ang nakasulod sa national level, lakip ang KNP ubos sa PLGU-led Category ug ang Sindangan FACOMA ubos sa Outstanding Partner Institution Category.
Gisusi usab sa mga evaluator ang implementasyon sa Kadiwa sa probinsya, lakip ang aktwal nga operasyon ug koordinasyon sa mga ahensya ug asosasyon sa mag-uuma.
Sumala sa mga opisyales, ang lig-on nga panagtinabangay sa gobyerno ug mga partner nga sektor maoy nakapahimo nga mahimong epektibo ang programa sa pagpalapad sa merkado ug pagpalig-on sa lokal nga ekonomiya.
Ang maong pag-apil sa nasudnong search nagpakita sa padayon nga pag-uswag sa mga inisyatiba sa probinsya alang sa kaayohan sa mga mag-uuma ug konsumidor.(IKEN B. GULLEM)
Source: Zamboaanga del Norte Provincial News Network