Gisugdan na ang duha ka dagkong proyekto sa imprastraktura sa Dakbayan sa Danao niadtong Abril 28, isip kabahin sa paningkamot sa lokal nga gobyerno nga mapalambo ang koneksyon ug serbisyo alang sa katawhan.
Sa maong kalihokan, gipangulohan nila Mayor Nito Durano, Vice Mayor Ivy Durano, ug Gobernador Pamela Baricuatro ang groundbreaking ceremony alang sa Guinacot–Taboc Bridge ug sa pagpaayo sa City Waterworks System. Ang duha ka proyekto gipondohan sa Probinsya sa Sugbo.
Sumala sa mga opisyal, ang maong mga proyekto magpalig-on sa koneksyon sa mga barangay ug maghatag og mas maayong serbisyo sa mga residente. Gipasiugda usab ni Mayor Durano nga kini kabahin sa padayon nga plano sa dakbayan nga mapadool ang mga serbisyo ug mapalambo ang panginabuhi sa mga Danawanon.
Ang Guinacot–Taboc Bridge nga 42 metros ang gitas-on ug 8 metros ang gilapdon mopuli sa daan nga footbridge nga nadaot sa bagyong Tino. Kung mahuman na, maghatag kini og mas luwas ug paspas nga pagbiyahe tali sa Barangay Guinacot ug Barangay Taboc.
Samtang, ang proyekto sa waterworks system magpalig-on sa suplay sa tubig sa dakbayan. Lakip sa buhaton ang pagtukod og clarifier facility, dugang nga flocculation tank, duha ka water tank nga adunay kapasidad nga 5,000 cubic meters matag usa, ug pagbutang og mga underground pipelines aron mas daghang lugar ang maserbisyohan.
Gipadayag usab ni Mayor Durano nga ang dakbayan nagpadayon sa paghatag og barato nga tubig, nga nagkantidad og 50 pesos matag 10 cubic meters, ug karon nagsilbi na sa kapin 17,000 ka panimalay sa Danao City.
Source: Cebu Province PIO
I via Renante Socia Lada