Nagmando kagahapong adlawa, Abril 29, ang Department of the Interior and Local Government (DILG) sa tanang Local Government Units (LGUs) sa nasud sa hugot nga pagbantay ug pagpugong sa grass ug forest fires, ilabi na samtang nagkakusog ang init nga panahon ug posible nga epekto sa El Niño.
Gi-awhag ang mga LGUs nga hugtan ang monitoring sa mga delikadong lugar, ipatuman ang pagdili sa pagsunog sa basura ug uga nga sagbot, ug siguruhon ang hapsay nga pagdumala sa basura sa mga komunidad. Gipasiugda usab ang pagpalig-on sa kampanya batok sa open burning ug ang pagpangandam sa emerhensya nga pagtubag sa sunog.
Gimando usab ang mas lig-on nga koordinasyon sa mga ahensya ug tukmang pagreport sa mga insidente ngadto sa Office of Civil Defense.
Dungan niini, gi-awhag ang publiko sa pag-amping ug paglikay sa bisan unsang kalihokan nga mahimong hinungdan sa kalayo sa ilang palibot.(IKEN B. GULLEM)
Source: Dipolog City Government