Sa paspas ug tinabangay nga aksyon sa Dumanjug Municipal Police Station (MPS) miresulta sa pagdakop sa usa ka armadong lalaki niadtong gabii sa Disyembre 16, 2025, nga nakalikay sa posibleng kadaut sa katawhan ug sa mga pulis.
Mga alas 10:01 sa gabii, nangayo og tabang ang Emergency Response Team (ERT) may kalabotan sa usa ka lalaki nga giila sa alyas nga “Ling-ling,” residente sa Barangay Pawa, Dumanjug, Cebu. Sumala sa report, nahubog ang suspek, armado og hait nga hinagiban, ug nagsamok sa mga habal-habal driver.
Samtang gisusi pa sa mga pulis ang report sulod sa estasyon, kalit mitungha ang suspek nga dala gihapon ang hinagiban. Gitistingan sa mga pulis nga pakalmahon ang sitwasyon, apan misulay og dunggab ang suspek sa desk officer nga nakalikay sa kadaut.
Mikalagiw ang suspek ug mihimo ang hot pursuit. Sa Barangay Sima, nagpadayon siya sa agresibong binuhatan, lakip ang paglabay og bato nga nakaigo sa usa ka pulis.
Misamot pa ang hulga dihang nakuha sa suspek ang usa ka government-issued firearm ug giti-unan ang mga pulis. Mitungha ang panagbangi ug napugos ang usa ka pulis nga magpabuto sa iyang service firearm, nga miigo sa tuo nga paa sa suspek aron mapahunong ang hulga.
Ang suspek ug ang nasamdan nga pulis gidala dayon sa pinakaduol nga district hospital alang sa pagtambal. Gisumite na ang mga papeles alang sa kaso nga Qualified Direct Assault, Attempted Murder, ug Assault upon a Person in Authority / Resistance and Disobedience, ug naghulat na sa inquest proceedings sa Provincial Prosecutor.
Gidayeg ni PBGEN Redrico A. Maranan, Regional Director sa PRO7, ang paspas ug propesyonal nga aksyon sa Dumanjug MPS, nga miingon nga kini nakapanalipod sa komunidad ug sa kauban nga mga pulis, ug nagpakita sa tinuod nga Serbisyong Mabilis, Tapat ug Nararamdaman sa PNP.
Source: PRO7 PIO
I via Renante Socia Lada