Nadakpan sa Police Regional Office 7 (PRO7) ang usa ka top 4 Most Wanted Person sa rehiyon nga giila sa alyas nga “Deev,” 33 anyos, lider sa COSE gun-for-hire group, human napatuman ang warrant of arrest sa kasong murder sa Cebu City.
Niadtong Disyembre 18, 2025, ang mga sakop sa kapulisan ubos sa pagdumala ni PLTCOL Ferdinand M. Casiano, Force Commander sa City Mobile Force Company sa Cebu City Police Office, mipatuman sa warrant nga gi-isyu sa Regional Trial Court Branch 17, Cebu City. Ang pagdakop nahitabo sa Osmeña Street, Barangay Sambag 2, ug walay piyansa nga gitakda.
Sumala sa PNP, natanggong na si alias Deev kaniadto niadtong 2019 tungod sa mga kaso ilawom sa RA 9165 (illegal drugs) ug nakagawas niadtong 2022. Human niini, siya gituohang nangulo sa COSE gun-for-hire group nga naglihok sa Central Visayas, ug giila nga hulga sa kaluwasan sa publiko.
Gidayeg ni PBGEN Redrico A. Maranan, Regional Director sa PRO7, ang pagdakop ug giingon nga dako kini’g tabang sa pagpugong sa krimen ug pagpanalipod sa komunidad. Matod pa niya, ang kalampusan bunga sa lig-on nga intelligence work, padayon nga pagbantay, ug maayong koordinasyon sa komunidad.
Padayon, matod sa PRO7, ang intelligence-driven operations ug pakig-uban sa katawhan aron mapadayon ang kalinaw ug kahapsay sa tibuok Central Visayas.
Source: PRO7 PIO
I via Renante Socia Lada