DIPOLOG CITY — Gipahimangnoan sa Department of Trade and Industry (DTI) ang publiko nga posibleng mosaka ang presyo sa mga batakang palaliton bisan pa og nagpabiling igo ug stable ang suplay hangtod sa bulan sa Mayo.
Sumala sa DTI, ang posibleng pagtaas sa presyo dili tungod sa kakulang sa produkto, kundili sa pagsaka sa gasto sa logistics sama sa transportasyon ug kuryente, nga naapektuhan sa kasamtangang krisis sa Middle East.
Padayon usab ang pagmonitor sa presyo sa tanang lungsod sa probinsya, uban sa pakigtambayayong sa ubang ahensya aron malikayan ang overpricing ug mapanalipdan ang mga konsumante.
Giawhag sa DTI ang publiko nga magpalit lamang sa igo nga panginahanglan ug magpabiling alerto, samtang gipalig-on sa probinsya ang koordinasyon sa mga ahensya aron masiguro ang patas nga presyo ug hustong suplay sa merkado.(JENIFFER JR. DELICA)
Source: Zamboanga del Norte Provincial News Network