Gikatakdang ipahigayon sa kagamhanang lokal sa siyudad sa Dipolog ang Pre-Valentine Mass Wedding karong umaabot Pebrero 13, 2026, isip libreng programa alang sa mga magtiayon nga gustong lig-onon sa kasal ang ilang panaghiusa.
Kini pangunahan sa City Civil Registrar’s Office uban sa koordinasyon sa nagkalain-laing buhatan sa siyudad. Gitumong niini ang pagtabang sa mga Dipolognon ug sa mga adunay kagikan nga taga-Dipolog, ilabi na kadtong dugay nang nag-ipon apan wala pa makasal tungod sa kakulang sa pinansiyal.
Gidasig ang mga interesadong magtiayon nga magparehistro ug mosumiter sa gikinahanglan nga mga rekesitos didto sa City Civil Registrar aron maproseso ang marriage license. Ang deadline sa pagsumiter sa mga dokumento Enero 30, 2026.
Lakip usab sa kalihokan ang prenup pictorial nga ipahigayon sa Museo Dipolog karong Enero 17 ug 24, 2026, alas 8:00 sa buntag, isip handumanan sa maong panaghiusa.(IKEN B. GULLEM)
Source: Dipolog City Government