Gipangunahan ni Third District Representative Adrian “Ian” Amatong ang substitute bill sa House Bill No. 7452 nga nagtumong sa pagtukod sa National Recovery and Acceleration Program to Reduce Poverty and Enhance the Economic Conditions of the Poorest Provinces in the Country aron mapalig-on ang mga programa batok sa kapobrehon sa mga labing kabus nga probinsiya.
Ang panukalang balaod naglatid sa paghatag og mas organisado ug igo nga pondo alang sa mga programa sa gobyerno nga motubag sa panginahanglan sa mga kabus nga lalawigan, lakip ang imprastraktura, agrikultura, edukasyon, panglawas, panginabuhian ug pagpalambo sa lokal nga ekonomiya.
Kabahin sa pag-andam sa maong balaod, gipatawag sa Committee on Poverty Alleviation-Technical Working Group ang nagkadaiyang ahensya sa nasudnong gobyerno aron hisgutan ang framework ug pondo nga gikinahanglan alang sa implementasyon sa programa.
Sa iyang pahayag, giingon ni Cong. Amatong nga padayon siyang mangita og mga paagi aron mapauswag ang kahimtang sa iyang mga konstituwente ug matabangan ang mga kabus nga probinsiya pinaagi sa epektibong mga polisiya ug programa sa gobyerno.(IKEN B. GULLEM)
Source: RoNey PaCilan Tv
Photo: Adrian Amatong fb