Mokabat sa 19 ka lokal ug internasyonal nga employers ug mga ahensya ang mitanyag og nagkadaiyang bakanteng trabaho atol sa Job Fair nga gipahigayon sa City Government of Dapitan niadtong Hunyo 18 isip kabahin sa selebrasyon sa ika-63 Charter Day sa siyudad.
Gipasiugdahan ang kalihokan pinaagi sa pakigtambayayong sa Department of Labor and Employment (DOLE) ug Public Employment Service Office (PESO) aron mapadali ang pagdugtong sa mga Dapitanon nga nangitag trabaho ngadto sa mga kompanya ug ahensya nga nanginahanglan og empleyado.
Gipangulohan ni Mayor Evelyn “Belen” T. Uy ang ceremonial ribbon-cutting uban sa mga opisyal sa PESO, DOLE ug Department of Migrant Workers (DMW), nga maoy nagbukas sa Job Fair ngadto sa mga aplikante.
Gawas sa mga oportunidad sa trabaho, gipahigayon usab ang orientation bahin sa Anti-Illegal Recruitment ug Trafficking in Persons aron mapanalipdan ang mga aplikante batok sa mga iligal nga recruitment ug pagpangilad.
Kini nga Job Fair kabahin sa padayon nga paningkamot sa City Government of Dapitan sa paghatag og mas daghang oportunidad sa trabaho ug pagpalambo sa panginabuhian sa mga Dapitanon.(IKEN B. GULLEM)
Source: Dapitan City Government