Gituki sa Zamboanga del Norte ang mga pondo, workforce development ug implementasyon sa bag-ong balaod aron mas mapalig-on ang Early Childhood Care and Development (ECCD) programs sa probinsya.
Nahimong sentro sa 3rd Quarter ECCD Meeting niadtong Agosto 28 ang mga lakang aron mas mapaayo ang pagpatuman sa mga programa alang sa kabataan, lakip ang papel sa mga local government units (LGUs) sa paghatag sa gikinahanglang serbisyo.
Gipahisgutan ni UNICEF Consultant Alvin U. Dumduma ang implementasyon sa Republic Act No. 12199, lakip ang mga mekanismo nga makatabang sa LGUs sa pagpalig-on sa ilang ECCD programs.
Gituki usab ang nagkadaiyang tinubdan sa pondo alang sa ECCD, sama sa LGU funds, Special Education Fund (SEF), Gender and Development (GAD) Fund, Local Government Support Fund (LGSF) ug national infrastructure grants.
Lakip sa hisgutanan ang paggamit sa maong mga pondo alang sa pagtukod ug pagpalambo sa Child Development Centers (CDCs) aron mas mapauswag ang pasilidad ug serbisyo alang sa mga bata.
Dugang nga gitutokan ang ECCD workforce, ilabina ang standardized training, continuing education ug technical assistance alang sa mga child development workers.
Gipresentar usab ni ECCD Focal Person Marjorie Pascua ang ECCD Program Directory ug ang consolidation sa accomplishment report sa training ug rollout sa “Being the Best CDW I Can Be.”
Mitambong sa panagtigom ang mga Municipal Social Welfare and Development Officers (MSWDOs), Early Childhood Development workers, ECCD focal persons ug mga representante sa nagkadaiyang sektor.
Samtang, gipasiugda ni Children Welfare Focal Person Katrina M. Raneses ang importansya sa hiniusang paningkamot sa mga ginikanan, magtutudlo, community leaders ug stakeholders sa paghatag og husto nga pag-atiman, nutrisyon, edukasyon ug proteksyon sa mga kabataan.
Gipadayag usab sa miting ang suporta ni Governor Darel Dexter T. Uy sa padayong pagpalig-on sa mga programa ug inisyatiba alang sa kabataan sa probinsya.(IKEN B. GULLEM)
Source: Zamboanga del Norte Provincial News Network