Naaprobahan na ang pondo alang sa pagpalit og Yuta, nga pagatukoran og bag-ong Merkado Publiko sa Dapitan, diin ang nasangpit nga pag-aprobar niini, atol sa gipahigayon nga City Development CouncIl (CSC) Meeting, didto sa Amphitheater, sa Dapitan City Government Center, niadtong nakalabay’ng adlaw, Agusto 15, 2025.
Nasayran nga ang pondo nga naaprobahan, alang sa pagpalit og yuta nga pagatukoran og Merkado, ana sa Php32,754,000.00, diin ang lokasyon sa maong yuta, atua nahimotang sa Barangay Linabo sa dakbayan sa Dapitan, nga mokabat ang gilapdon niini ngadto sa 1.4 hectares, nga matud pa, ang nahisgutang kantidad, lakip nga kuhaon niini, ang uban pang mga bayrunon sa pag-asikaso sa maong proyekto.
Ang naasoy nga City Development Councel (CDC) Meeting, gipangunahan mismo ni Mayor Evelyn T. Uy, uban nila nila City Administrator Danilo S. Areños Jr. ug ni Raul Abejero ang City Planning and Development Coordinator sa nasangpit nga dakbayan.
Sa pahayag nga giluwatan ni Mayor Belen Uy, nga sa iyang pagsulod isip Mayor sa Dapitan, iyang nadungog nga sirado ang Merkado, maong mao gyud dayon kini ang giuna niya nga prayoridad. Dugang pa sa iyang pahayag, nga ang Merkado matud pa ang pinakadakong hagit karon sa Syudad sa Dapitan, tungod niini, gipatin-aw sa City Administrator, pinaagi ni Areños Jr, nga ang pondo alang sa proyekto kuhaon pinaagi sa reprograming, mga pondo nga gitagana unta sa laing proyekto, apan wala madayon tungod sa pagkansela sa suppliers, maong mao nalang kini ang gigahin aron makapalit og yuta nga maoy tukoran sa bag-ong merkado publiko.
Dugang pa niini, nga gi- aprobahan ang reprograming nga nagkantidad og Php18,500,000.00, ug aron makumpleto ang gikinahanglan nga budget, gi-allocate usab ang Php16,000,000.00, gikan sa General Fund, ngadto sa 20% Development Fund, isip supplemental budget sa maong lakang, aron lang mapiho, nga makapalit dayon og yuta ang dakbayan, alang sa proyekto nga bag-ong Merkado Publiko.
Gipasabot usab ni Areños Jr. nga ang reprograming dili nagpasabot, nga biyaan ang ubang mga proyekto, sama sa water system, ug concreting sa Barangay Banonong-Lawaan, ug sa Barangay Ba-ao, nga matud pa niini, kung adunay matigom nga pondo, ibalik ra usab kini ngadto sa nasangpit nga mga proyekto. Lakip usab nga gihisgutan, ang unang Plano nga ibutang ang merkado sa Barangay Polo.
Apan human sa assessment sa City Engineering ug City Planning uban ni Mayor Belen Uy, gipasabot nga dili angayan ang maong lugar, tungod kay magkinahanglan pa kini og dakong magasto alang sa pagtambak nga matud pa, halos 2 metros ang giladmon, gawas pa niana, nga pit-os pa ang dalan sa maong lugar, naa pa ang sitwasyon sa river control nga wala pa nahuman, kon ikumopara sa Barangay Linabo nga plastar ug andam na ang lugar para sa maong proyekto.(Julius Esmade)
Source: CITY GOVERNMENT OF DAPITAN