DIPATAN CITY — Giturn-over sa Philippine National Police Maritime Group–Zamboanga del Norte Maritime Police Station ang usa ka Reticulated Python ug usa ka White-eared Brown Dove ngadto sa CENRO Piñan alang sa hustong pagdumala ug pagbalik sa natural nilang puy-anan.
Ang sawa nakit-an sulod sa usa ka panimalay sa Barangay Aseniero, samtang ang langgam nasangit sa pukot duol sa balay sa Barangay Banbanan. Tungod sa kahibalo sa Wildlife Act, gitipigan sa mga concerned citizens ang mga mananap ug gitugyan sa PNP Maritime nga nagpatrolya sa lugar aron ma-endorso sa DENR.
Gisusi sa mga personnel sa DENR ang kahimtangan sa duha ka mananap ug nakit-ang walay samad ug anaa sa maayong kondisyon. Ang sawa may gitas-on nga kapin 166 sentimetro ug giila nga andam ibalik sa lasang.
Ang maong turnover nagpakita sa lig-on nga koordinasyon tali sa DENR ug PNP Maritime sa pagpatuman sa balaod sa kinaiyahan ug sa aktibong papel sa komunidad sa pagpanalipod sa wildlife resources.(JENIFFER JR. DELICA)
Source: DENR Zamboanga Peninsula