Gisaulog sa Police Regional Office 7 (PRO7) ang ika-35 nga PNP Day atol sa flag raising ceremony sa Camp Sergio Osmeña Sr., Cebu City ning Pebrero 23, 2026. Ang maong kalihokan gipangunahan uban si Atty. Rafael Vicente R. Calinisan sa National Police Commission isip guest of honor ug speaker.
Ang PNP Day gisaulog matag tuig aron pasidunggan ang dedikasyon ug sakripisyo sa mga miyembro sa Philippine National Police sa pagpanalipod sa katawhan ug pagmintinar sa kalinaw ug kahapsay sa komunidad. Kini usab higayon sa pag-ila sa talagsaong nahimo sa mga opisyal ug yunit sa kapulisan.
Gihatagan og PNP Efficiency Medal ug mga plake ang nagkalain-laing opisyal ug personnel nga adunay maayong performance sa administrasyon ug operasyon. Giila usab ang mga non-uniformed personnel nga naghatag og dakong kontribusyon sa kalampusan sa organisasyon.
Dugang pa, giila ang pipila ka police units sama sa Bohol Police Provincial Office, Mandaue City Police Office, ug Cebu City Police Office tungod sa ilang outstanding nga performance sa ilang tagsa-tagsa ka lugar.
Gipasidunggan usab ang mga lokal nga kagamhanan ug stakeholders nga nagpakita og lig-on nga suporta sa kapulisan.
Sumala sa pamunuan sa PRO7, ang kalampusan sa organisasyon naggikan sa disiplina, professionalism, ug panaghiusa sa kapin 10,000 ka personnel sa rehiyon.
Ang selebrasyon nagpasiugda sa padayon nga paningkamot sa kapulisan sa paghatag og “Serbisyong Nararamdaman, Kapulisang Maaasahan” alang sa katawhan sa Central Visayas.
Source: PRO7 PIO
I via Renante Socia Lada