Kagahapong adlawa Oktubre 29, 2025 dayon nga mitabang ang Probinsiyal nga Pangagamhanan sa Zamboanga del Norte, pinangulohan ni Gobernador Darel Dexter Uy, uban ang Zamboanga del Norte-Provincial Disaster Risk Reduction and Management Office (PDRRMO), alang sa pito ka pamilya nga nawad-an ug puloy-anan human sa sunog nga nahitabo sa Barangay Bolicon, Turno kaniadtong Oktubre 28.
Gipang-apod-apod ang mga household kits nga naglangkob sa mga suplay ug gamit pangbalay aron matabangan ang mga biktima sa ilang pagbangon gikan sa trahedya. Ang maong kalihokan gihimo uban sa pakigtambayayong ni Barangay Chairman Ramoncito “Junjun” Barbaso, nga nagpadayag sa tinabangay tali sa lokal ug probinsiyal nga pangagamhanan.
Matud ni Gob. Uy, padayon ang iyang komitment sa pagtabang ug paghatag suporta sa mga naapektuhan, ilabi na sa mga panahong dunay kalamidad. Gipasiugda usab niya nga magpadayon ang panaghiusa sa komunidad aron mapasig-uli ang kalinaw ug kabag-ohan sa lugar.(IKEN B. GULLEM)
Photo courtesy: Zamboanga del Norte Provincial News Network