Aktibong mitambong ang mga Local Chief Executives (LCEs) sa lalawigan sa Zamboanga del Norte sa One-Day Executive Orientation on Disaster Risk Reduction and Management (DRRM) nga gipasiugdahan sa Office of Civil Defense (OCD) Region IX uban ni Regional Director Atty. Ruel S. Halanes niadtong Oktubre 28, 2025, sa Top Plaza Hotel, Dipolog City.
Ang kalihukan nga gimugna ubos sa tema nga “Leading with Foresight, Acting with Resilience,” nagpunting sa pagpalig-on sa kaandam, liderato, ug koordinasyon sa mga lokal nga opisyal aron mas maprotektahan ang ilang mga komunidad gikan sa epekto sa natural ug human-induced hazards.
Gipasabot sa oryentasyon ang papel sa mga LCEs ubos sa Republic Act 10121 (Philippine DRRM Act of 2010) nga naglatid sa ilang katungdanan sa pagpanalipod sa katawhan ug sa pagpatuman sa mga epektibong pamaagi sa disaster preparedness, response, ug recovery.
Si Gobernador Darel Dexter Uy, usa sa mga nag-unang mitambong, mipasiugda sa importansya sa proaktibong liderato ug kolaborasyon tali sa mga LGU aron mapalambo ang DRRM initiatives sa probinsya. Sama usab niini, si Atty. Arvin Bonbon, Provincial DRRM Officer, mipresentar sa DRRM thrusts ug mga prioridad sa lalawigan nga gidayeg tungod sa padayon niyang suporta ug teknikal nga giya.
Pinaagi sa ZamPen-LEAD orientation, nagpakita ang mga lider sa Zamboanga del Norte sa ilang tinud-anay nga komitment sa pagpalig-on sa resiliency sa lokal nga pangagamhanan.(IKEN B. GULLEM)
Source: Civil Defense IX – Zamboanga Peninsula