Aron masayran kon nakab-ot ba ang tumong sa implementasyon sa mga programa sa nutrisyon dinhi sa dakbayan, ang City Nutrition Office ang mipahigayon sa duha ka adlaw nga “Program Implementation Review (PIR)” sugod Disyembre 19 ning tuiga.
Si konsehal Marilou Y. Calibo, isip representante ni Mayor Darel Dexter T. Uy, ang midayeg sa kakugi sa mga Barangay Nutrition Scholars (BNS) aron matutokan ang maayong panglawas sa mga bata ug mga mabdos dinha sa ilang tagsa-tagsa ka mga barangay.
Nasayran nga niining maong aktibidad, gitahasan ang 32 ka Barangay Nutrition Scholars (BNS) gikan sa 21 ka mga barangay sa dakbayan nga motaho sa ilang mga “accomplishments” ning tuiga aron mahibaw-an kon napatuman ba gayod ang mga programa sa City Nutrition Office.
Lakip sa mitambong sa PIR mao sila si Ms. Edna P. Galea, City Nutrition Action Officer, Ms. Herma P. Camps, Nutrition Officer II, Ms. Lane M. Sorronda City, Nutrition Program Coordinator ug uban pang mga personahe sa nahisgutan nga buhatan.
(Source: Dipolog City Government Facebook page)