Nagpagula ug opisyal nga pamahayag ang Provincial Health Office (PHO)–Zamboanga del Norte human sa pagmantala sa pipila ka media outlets sa gidaghanon sa kaso sa HIV matag munisipyo sa probinsya. Gipasabot sa PHO nga ang pagtaas sa natala nga kaso dili pasabot nga misaka dayon ang transmisyon, kondili resulta sa mas kusog ug lig-on nga screening ug case-finding efforts sa kagamhanan ug health partners.
Matod sa PHO, ang mas aktibong pag-screen nagtugot sa mas daghang katawhan nga matabangan, mas mapaspasan ang pagtudlo sa tukmang tambal, ug mapugngan ang dugang transmisyon sa komunidad. Ilang gipahimangnoan ang publiko nga dili angay mohatag og stigma o paghusga sa indibidwal o lugar nga nalakip sa datos tungod kay ang HIV usa ka kondisyon sa kahimsog ug dili sukdanan sa moralidad.
Nanawagan ang PHO sa media nga ipresentar ang impormasyon uban sa hustong konteksto ug katarungan, likayan ang sensationalism, ug tabangan ang pagpalapnag sa husto nga kahibalo kabahin sa HIV. Gipangayo usab sa opisina ang padayon nga kooperasyon aron mapakusgan ang awareness, pagsabot, ug suporta alang sa mga apektado sa maong kondisyon.(IKEN B.G ULLEM)
Source: Zamboanga del Norte Provincial News Network