Gipakusgan sa Office of Civil Defense Region IX (OCD IX) ang kapasidad sa Dapitan City Disaster Risk Reduction and Management Office (CDRRMO) pinaagi sa Emergency Operations Center (EOC) Training nga gihimo sa DCGEA-MPC Function Hall, Dawo, Dapitan City.
Ubos sa pagpangulo ni OCD IX Regional Director Atty. Ruel S. Halanes, ang training nagtumong sa pagpauswag sa kahibalo ug kahanas sa mga disaster personnel sa husto nga pagdumala sa impormasyon, koordinasyon, komunikasyon ug paghimog desisyon atol sa mga emerhensya ug kalamidad.
Gipasiugda sa kalihokan ang EOC isip sentro sa emergency operations diin tigom, analisahon ug ipakaylap ang importanteng impormasyon aron magiya sa tukmang mga lakang sa pagtubag sa kalamidad.
Mitambong isip mga facilitator ug resource persons sila Mr. Angelito R. Casinillo, Chief sa Capacity Building and Training Section sa OCD IX; Ms. Michelle Fernandez Yague, instructor; Engr. Nelson Quimiguing ug Ms. Jeralene Acaylar sa Dapitan City CDRRMO; ug Mr. Bryan Jauculan sa Dipolog City CDRRMO.
Pinaagi sa lectures, interactive discussions ug practical exercises, napalig-on usab ang pagtinabangay ug pagpaambit sa mga pamaagi sa pagdumala sa emerhensya tali sa mga disaster management personnel sa nagkalain-laing local government units.
Adunay 36 ka personnel sa Dapitan City CDRRMO nga malampusong nakakompleto sa training, nga dugang nga kapasidad alang sa disaster preparedness ug response sa siyudad.
Pinaagi sa padayong capacity-building programs sama sa EOC Training, gipadayon sa OCD IX ang paningkamot sa pagpalig-on sa mga lokal nga pangagamhanan ug pagtukod og mas andam, responsive ug disaster-resilient nga mga komunidad sa Region IX.(IKEN B. GULLEM)
Source: Civil Defense IX- Zamboanga Peninsula