Gisugdan kagahapong adlawa ang pagparehistro sa mga kawani ug empleyado sa Provincial Capitol alang sa PhilHealth YAKAP o Yaman ng Kalusugan Program.
Gihimo ang registration sa Hall 2 sa Provincial Capitol Building, diin gidasig ang mga empleyado nga magparehistro ug mokompleto sa First Patient Encounter (FPE) uban sa Zamboanga del Norte Medical Center (ZNMC), nga gitudlo isip primary YAKAP healthcare provider.
Kabahin ang maong programa sa pagsuporta sa probinsyal nga pangagamhanan ubos sa pagpangulo ni Governor Darel Dexter T. Uy sa implementasyon sa PhilHealth YAKAP Program, nga nagtumong sa paghatag og mas sayon nga access sa mga serbisyo panglawas alang sa mga benepisyaryo.
Ang registration bukas gikan Septiyembre 1 hangtod 15, 2026, alas-9:00 sa buntag hangtod alas-5:00 sa hapon.
Lakip sa mga benepisyo nga mahimong mapahimuslan pinaagi sa YAKAP Program ang libre nga konsultasyon ug mga gikinahanglang laboratory tests, depende sa kwalipikasyon ug coverage sa programa.
Nanguna sa registration ang mga personahe sa ZNMC, uban ni Dr. Antonio M. Aguirre, MD, General Practitioner ug PhilHealth-accredited nga doktor alang sa YAKAP Program.
Gipahinumdoman ang mga empleyado nga magdala og valid ID ug PhilHealth Identification Number (PIN) aron mas paspas ang proseso sa ilang pagparehistro.(IKEN B. GULLEM)
Source: Zamboanga del Norte Provincial News Network