Niadtong Agosto 12–13, 2026, malampusong gipahigayon ang PhilHealth Registration Caravan ug YAKAP Facility Assignment sa Population Barangay Hall, Salug, Zamboanga del Norte, nga nagtumong sa pagpalapit sa mga serbisyo panglawas ngadto sa matag Salugnon.
Ang kalihokan gipangulohan sa Municipal Health Office of Salug ubos sa pagpangulo ni Dr. Mery Jean E. Bendijo, Municipal Health Officer, sa pakigtambayayong sa PhilHealth Dipolog Branch. Pinaagi sa maong kalihokan, gihatagan og registration assistance ang mga residente ug gipatin-aw ang mga serbisyo ug benepisyo nga anaa ilawom sa YAKAP Program.
Importante ang maong inisyatibo aron mas daghang mga Salugnon ang maabot sa serbisyo sa PhilHealth ug makabenepisyo sa mga programa nga gitumong alang sa ilang panglawas. Kini usab naghatag og oportunidad sa komunidad nga mas masabtan ang kahinungdanon sa pagparehistro ug paggamit sa mga serbisyo panglawas nga anaa alang kanila.
Nagpadayon ang Local Government Unit of Salug, Municipal Health Office, ug PhilHealth sa ilang lig-on nga panag-uban aron mapalambo ang serbisyo panglawas ug masiguro nga kini mahimong accessible ug maabot sa matag lumulupyo.(IKEN B. GULLEM)
Source: Municipality of Salug