Nagpatuman ang probinsyal nga gobyerno sa Zamboanga del Norte og **compressed work schedule** sugod Marso 9, 2026 aron mapakunhod ang konsumo sa kuryente ug gasolina samtang gisiguro ang padayon nga paghatag og serbisyo sa publiko.
Pinaagi sa Executive Order No. 16, Series of 2026 nga gipagawas ni Darel T. Uy, ang mga empleyado sa probinsya mosulod og upat ka adlaw matag semana, apan magpabiling abli sa publiko ang mga opisina gikan Lunes hangtod Biyernes.
Ubos sa bag-ong iskedyul, magsugod ang oras sa trabaho alas 7:00 sa buntag hangtod alas 6:00 sa gabii aron matuman gihapon ang 40-oras nga workweek nga gikinahanglan sa Civil Service Commission. Ang matag departamento mahimong mopili kung Lunes hangtod Huwebes o Martes hangtod Biyernes ang iskedyul sa ilang empleyado depende sa panginahanglan sa operasyon.
Gipasiugda sa probinsyal nga gobyerno nga magpadayon ang normal nga operasyon sa mga essential ug frontline services sama sa Zamboanga del Norte Medical Center, district hospitals, infirmaries ug public safety units aron masiguro nga walay hunong ang pagserbisyo sa katawhan bisan pa sa pagpatuman sa mga lakang sa pagdaginot sa enerhiya.(JENIFFER JR. DELICA)
Source: Zamboanga del Norte Provincial News Network