Gikatakdang ipahigayon karong umaabot adlaw’ng Biernes, Mayo 19, 2023, ang “P’gsalabuk Street Dancing” dinhi sa dakbayan sa Dipolog isip paghatag og bolok sa kasaulogan sa 24th Dipolog P’gsalabuk Festival ning atong siyudad.
Sinalmotan sa pito (7) ka mga contingents, ang mga participants ang mopakita sa ilang talento sa pagsayaw, partikular na ang choreography niini, diin kini ang gipahigayon nga indigay, ilawom sa pagpasiugda sa City Tourism Arts, Culture and Sports (CTACS) Council ning atong siyudad.
Subay sa pagpahigayon ning maong street dancing activity, kinasing-kasing karong nagahangyo ang kagamhanang lokal ning siyudad alang sa inyong pagsabot kalabot na sa temporaryong pagpatuman sa
“Re-routing”, aron sa paghatag og agi-anan alang sa street dance parade nga mahitabo gikan alas 3:00 ang takna sa hapon ngadto na sa alas 6:00 sa sayong gabii sa Mayo 19, 2023, nga mao usab ang bisperas sa kapistahan ni Sr. San Vicente Ferrer.
Ang particular nga dalan nga temporaryong isirado sa mga sakyanan mao ang dalan Rizal, sugod sa atubangan sa Museo Dipolog hangtud sa crossing sa Quezon Avenue, Quezon hangtud sa Velasco St., Velasco Street hangtud dalan Magsaysay ug porsiyon sa dalan Magsaysay padulong sa Listo Center, padulong na didto sa “Explore Dipolog” area sa Dipolog Boulevard alang sa contest proper. nga maoy mahimong rota sa Street Dance Parade.
Tungod sa pagahimoong dugang pagpangandam, ang temporaryong “Re-Routing” ang magasugod sa ala 1:00 sa hapon, ug molungtad hangtud na sa pagka alas 6:00 sa gabii.
Ang ubang kadalanan ang magpabilin rang bukas ngadto sa mga sakyanan, gawas sa mga nahisgotang dalan sa unahan.
(Source: Dipolog City Government Facebook page)