Gipakusgan sa Provincial Peace and Order Council (PPOC) ug Provincial Anti-Drug Abuse Council (PADAC) ang ilang hiniusang aksyon aron mas mapahapsay ang implementasyon sa mga programa batok sa krimen ug ilegal nga droga sa Zamboanga del Norte.
Sa ilang Joint 1st Quarter Meeting nga gipahigayon sa Zamboanga del Norte Convention and Exhibition Center, gipunting ang pagpalig-on sa koordinasyon tali sa mga ahensya isip yawe sa mas epektibong pagresponde sa mga isyu sa seguridad ug droga.
Gipangulohan ni Governor Darel Dexter T. Uy ang tigum diin giaprubahan ang Peace and Order and Public Safety Plan (POPS Plan) 2026–2028, nga maghatag og klarong direksyon sa mga lakang sa probinsya sa mosunod nga mga tuig.
Gipasiugda usab ang paggamit sa POPS-PCMS monitoring system aron masubay ang kahimtang sa implementasyon sa mga programa, samtang ang mga ahensya mipresentar sa ilang mga accomplishment ug padayon nga inisyatiba.
Sa bahin sa anti-drug campaign, gihisgutan ang Local Anti-Drug Plan of Action ug Project HARMONY aron mas mapalig-on ang koordinadong operasyon ug community-based approach batok sa ilegal nga droga.
Ang maong tigum nagpakita nga ang lig-on nga koordinasyon ug klarong plano maoy pundasyon sa pagpadayon sa kalinaw, kahapsay, ug kaluwasan sa Zamboanga del Norte.(IKEN B. GULLEM)
Source: Zamboanga del Norte Provincial News Network