Sumatotal siyam (9) ka pamilya sa Barangay Benigno Aquino, Sindangan, ang nakadawat og ayuda gikan sa Kagamhanang Probinsyal human sila maapektuhan sa sunog niadtong Enero 16.
Gipangunahan ang distribusyon ni Acting PSWDO Hannah Lou Mandantes uban sa suporta sa buhatan ni Gobernador Darel Dexter Uy. Matag pamilya nakadawat og P2,000 cash assistance, lima (5) ka kilo nga bugas, ug 90 ka sheets nga yero aron gamiton sa pagpatindog pag-usab sa ilang panimalay.
Sumala ni Mandantes, ang ayuda kabahin sa emergency response sa probinsya aron masiguro nga ang mga biktima makadawat og suporta samtang nagpadayon pa ang assessment sa dugang panginahanglan. Gipunting usab niya nga kini nga tabang makatabang sa dali nga pagtukod og temporaryong puluy-anan alang sa mga pamilya nga hingpit nga nawad-an sa ilang balay.
Samtang, padayon ang koordinasyon sa lokal nga gobyerno sa Sindangan ug uban pang ahensya aron matino ang dugang panginahanglan sa mga biktima, lakip ang posibilidad sa dugang relief assistance ug rehabilitasyon.(IKEN B. GULLEM)
Source: Zamboanga del Norte Provincial News Network