Isip kabahin sa pagpalig-on sa sektor sa agrikultura sa dakbayan, nag-apod-apod og agricultural inputs ang Kagamhanang Lokal sa Dapitan ngadto sa mga mag-uuma niadtong Marso 16, 2026 sa City Agriculture Compound.
Nakadawat ang mga miyembro sa nagkalain-laing farmers’ association og 100 ka sako sa binhi sa mais ug 100 ka sako sa complete fertilizer. Tumong niini nga mapataas ang produksyon sa mais ug masuportahan ang panginabuhian sa lokal nga mag-uuma.
Kini usab nga inisyatiba usa ka konkretong tubag sa panginahanglan sa mga mag-uuma, ilabi na sa pagsaka sa presyo sa mga agricultural inputs. Dugang pa, matag benepisyaryo nakadawat usab og 5 ka kilo nga bugas isip dugang tabang sa ilang adlaw-adlaw nga panginahanglan.
Naglakip ang mga mag-uuma gikan sa Barangay Burgos, Masidlakon, Ilaya, ug Dampalan nga aktibong nagtikad sa ilang mga kamaisan.
Pinaagi niini, nagpadayon ang LGU Dapitan sa paghatag og suporta sa sektor sa agrikultura aron mapalambo ang produksyon sa pagkaon ug mapalig-on ang kahimtang sa panginabuhi sa mga mag-uuma sa siyudad.(IKEN B. GULLEM)
Source: City Government of Dapitan