Mas gipaduol sa Philippine Coconut Authority (PCA) ang mga programa ug teknikal nga serbisyo niini ngadto sa mga mag-uuma sa lubi pinaagi sa serye sa community immersion ug field extension activities sa Barangay Palandok ug uban pang coconut-farming communities sa lungsod sa Leon B Postigo Zamboanga del Norte niadtong Septiyembre 24,2026.
Gipangunahan sa PCA Agriculturist nga naka-assign sa Leon B. Postigo ang direktang pagbisita ug pakig-istorya sa mga coconut farmer aron masuta ang aktuwal nga kahimtang sa ilang mga uma ug mga hagit nga ilang giatubang sa adlaw-adlaw nga pagpanguma.
Atol sa field visits, gihatagan og higayon ang mga mag-uuma nga ipadayag ang ilang mga kabalaka, kasinatian ug mga problema nga nakaapekto sa ilang produksiyon ug panginabuhi.
Lakip sa mga isyu nga kasagarang gihisgutan mao ang pag usab-usab sa presyo sa copra, epekto sa panahon ug klima sa produksyon sa lubi, peste ug sakit sa tanom, ubos nga farm productivity, ug mga problema sa panginabuhian sa mga pamilya nga nagsalig sa coconut farming.
Dili lamang pagpaminaw sa mga reklamo ang tumong sa maong immersion, kondili paghatag usab og tukmang impormasyon, teknikal nga tambag ug giya sa mga mag-uuma aron makatabang sa pagpauswag sa ilang pamaagi sa pagdumala sa uma ug produksiyon sa lubi.
Sumala sa PCA, importante ang kanunay nga presensya sa mga field personnel sa mga komunidad aron mas masabtan ang tinuod nga kahimtang sa mga mag-uuma ug mas maangay ang pagpatuman sa mga programa ug serbisyo sa ahensya.
Pinaagi sa direktang pakig-interaksyon sa mga coconut farmer, gipalig-on usab ang komunikasyon tali sa PCA ug mga farming communities aron mas klarong mailhan ang ilang mga panginahanglan ug mahatagan og hustong tubag pinaagi sa mga programa sa ahensya.(MEDALYN U. BORJA)
Source: Pca Zdn