Mas gipakusgan sa Schools Division Office (SDO) sa Dipolog City ang sistema sa emergency communication pinaagi sa pagporma sa Division Agile Response Team–Emergency Communication for Hazard Operations (DART-ECHO) ug orientation sa hustong paggamit sa radyo panahon sa kalamidad ug emerhensiya nga gipahigayon niadtong Septiyembre 24, 2026 sa TA Room sa SDO Dipolog City.
Ang kalihokan gihimo ubos sa Disaster Risk Reduction and Management Service (DRRMS) aron maandam ang mga personnel nga mahimong kabahin sa emergency communication network sa division.
Pinaagi sa DART-ECHO, gitumong nga mapalig-on ang komunikasyon tali sa division office, mga distrito ug mga eskwelahan, ilabina sa mga higayon nga maputol o maapektuhan ang ordinaryong linya sa komunikasyon tungod sa kalamidad.
Kabahin usab sa orientation ang mga protocol ug saktong pamaagi sa paggamit sa radio communication aron masiguro ang klaro,hapsay ug tukmang pagpaambit sa impormasyon atol sa operasyon sa emerhensiya.
Ang maong inisyatiba gilauman usab nga makatabang sa Division Incident Management Team (D-IMT) ug Division Emergency Operations Center (DEOC) sa mas episyenteng koordinasyon, pagdumala sa impormasyon ug pagresponde sa mga insidente sulod sa mga eskwelahan ug komunidad.
Pinaagi niini, gipunting sa SDO Dipolog City ang pagpalig-on sa tulo ka importanteng aspeto sa disaster response,andam nga komunikasyon, hapsay nga koordinasyon ug paspas nga pagresponde.(MEDALYN U. BORJA)
Source: DepED Dipolog DRRMS