Gipakusog sa Municipal Government of Godod ug Bureau of Fire Protection (BFP) ang ilang koordinasyon sa fire prevention ug emergency response atol sa courtesy visit sa bag-ong Municipal Fire Marshal sa lungsod niadtong Septiyembre 25, 2026.
Miduaw sa Office of the Municipal Mayor si SFO2 Rod Q. Fuentenegra, ang bag-ong gitudlo nga Fire Marshal sa Godod, diin iyang nakahinabi si Mayor Richie L. Uy kabahin sa mga prayoridad sa pagpanalipod sa katawhan batok sa sunog ug uban pang emerhensiya.
Gihisgutan sa maong tigpulong ang pagpalig-on sa fire prevention measures, disaster preparedness ug emergency response, lakip ang mas hapsay nga koordinasyon tali sa lokal nga panggobyerno ug BFP panahon sa mga insidente.
Gipahayag usab ni Mayor Uy ang iyang suporta sa mga programa sa BFP ug sa mga lakang nga nagtumong sa pagpausbaw sa kahibalo ug kaandam sa mga residente sa Godod.
Nasakop usab sa panaghisgot ang pagbalhin ni SFO1 Allain L. Dolar ngadto sa Munisipalidad sa Liloy. Tungod sa iyang natampo sa fire protection efforts sa Godod, nagpahayag ang mayor og hangyo nga unta magpabilin si Dolar sa lungsod, subay sa tukmang proseso ug pag-apruba sa mga hingtungdan nga opisyal sa BFP.
Gilauman sa LGU Godod nga magpadayon ang lig-on nga panag-uban sa BFP aron mapalambo pa ang fire prevention, emergency preparedness ug public safety programs alang sa mga katawhan sa Godod.
Pinaagi sa padayong koordinasyon sa duha ka ahensya, gitumong nga mas maandam ang komunidad ug mas mapalig-on ang kapasidad sa Godod sa pag-atubang sa sunog ug uban pang emerhensiya.(MEDALYN U. BORJA)
Source: Godod Zamboanga del Norte