Sa pagpaningkamot nga mapadali ang paghatag ug tukmang medikal nga atensyon, gipaluwas ug gibalhin ngadto sa Silliman University Medical Center (SUMC) sa Dumaguete City ang usa ka pasyente nga na-diagnose sa sakit nga leptospirosis gikan sa Barangay Barra, Dipolog City.
Tungod sa hinanaling pagpatambal nga wala’y ikahatag ang Zamboanga del Norte Medical Center (ZNMC), gikinahanglan nga mahatod dayon ang pasyente sa usa ka mas kompleto nga ospital. Ang maong pagbiyahe inubanan ni Joel Rey Carcasona, RN, ug sa iyang kauban nga si Rene Boy It-It, nga nagmaneho sa patient transport vehicle, nga malampuson nga nakahatod sa pasyente nga luwas ug stable ang kahimtang.
Ang maong aksyon usa ka ehemplo sa tinuod nga serbisyo publiko ug kadasig sa pagpangandam alang sa mga emerhensiya ubos sa liderato ni Governor Darel Dexter T. Uy. Gipasiugda usab niya nga ang mga kabus ug kritikal nga pasyente kinahanglan nga pirming mahatagan og prioridad, ilabi na kung ang ilang kinabuhi anaa sa peligro.
Ang maong inisyatibo nagpakita sa padayon nga dedikasyon sa Provincial Government of Zamboanga del Norte sa pagpalig-on sa serbisyo medikal ug pagpanalipod sa kahimsog sa mga lumulupyo sa probinsya.(Iken B. Gullem)
Photo courtesy: Zamboanga del Norte Provincial News Network