Gipakita sa mga mag-uuma sa Leon B. Postigo ang ilang abilidad ug abot sa uma atol sa Agri-Fair 2026 nga gipahigayon niadtong Septiyembre 8,2026, sa Municipal Gymnasium sa Leon B Postigo, Zambonga del Norte diin nagtigom sa mga prodyuser, konsumante, lokal nga panggamhanan ug mga kaabag nga sektor sa agrikultura.
Ang kalihokan nga nagdala sa tema nga “Ani sa Lungsod, Bahandi sa Katawhan!”(Harvest in Town, Wealth to the People) nga nagpasiugda sa papel sa agrikultura isip usa sa mga haligi sa panginabuhian ug kalamboan sa komunidad.
Kabahin sa tumong sa maong kalihokan ang paghatag og direct market alang sa mga mag-uuma aron mas mapalambo ang ilang kita ug malikayan ang sobra nga pagsalig sa mga middleman.
Pinaagi niini, mas dali usab nga makapalit ang mga residente og presko, dekalidad ug abot-kayang produkto gikan mismo sa mga prodyuser.
Nagkalain-laing abot sa uma ang gipakita sa mga booth, nga gilangkuban sa mga utanon, prutas, kalabasa, saging, root crops, mga panakot ug uban pang lokal nga produkto. Gipakita usab sa mga mag-uuma ang ilang suporta sa organikong pamaagi sa pagpanguma.
Dili lamang pagbaligya sa produkto ang nahimong sentro sa Agri-Fair, tungod kay gilakipan usab kini og mga diskusyon ug learning sessions nga nagtumong sa pagdugang sa kahibalo sa mga mag-uuma bahin sa mas bag-ong pamaagi sa produksiyon ug malungtarong agrikultura.
Gipasiugda ni Leon B Postigo Mayor Runie “BobbyJam” O. Jamora ang “Serbisyo GUgma” isip direksyon sa iyang administrasyon sa pagpalig-on sa panginabuhian sa mga mag-uuma ug pagpalambo sa lokal nga ekonomiya.
Gipasalamatan usab sa lokal nga panggamhanan ang mga institusyon nga mitampo sa kalampusan sa kalihokan, lakip ang Mindanao Development Authority (MinDA), BIMP-EAGA-ROK Cooperation Fund (BKCF), ug Knowledge Transfer Philippines, ingon man ang Provincial Government of Zamboanga del Norte ubos sa pagpangulo ni Governor Darel Dexter Uy.
Gipasidunggan usab ang presensya ni Board Member Leo Nicanor Mejorada, nga mitambong isip representante sa provincial leadership, lakip ang mga delegasyon gikan sa silingang mga lungsod ug ubang stakeholders.
Alang sa lokal nga panggamhanan, ang Agri-Fair 2026 dili lamang usa ka showcase sa mga produkto sa uma kondili usa usab ka lakang padulong sa mas lig-on nga merkado, mas lig-on nga panginabuhian ug mas malungtarong kaugmaon alang sa mga mag-uuma sa Leon B. Postigo.(MEDALYN U. BORJA)
Source: Municipal Government of Leon B Postigo