Gipakita ni Sindangan Mayor Glona D. Labadlabad ang lig-on niyang suporta sa mga mag-uuma pinaagi sa iyang pag-apil sa Agri-Fair 2026 sa Leon B. Postigo, Zambonga del Norte niadtong Septiyembre 8,2026,diin iyang gipasiugda ang pagtinabangay sa lokal nga panggamhanan ug nagkalain-laing sektor aron mapakusog ang panginabuhian ug ekonomiya sa komunidad.
Sa iyang mensahe atol sa kalihokan,gipasiugda ni Labadlabad nga importante ang padayon nga paghatag og suporta sa sektor sa agrikultura, ilabi na sa mga mag-uuma nga dakong kontribusyon sa suplay sa pagkaon ug lokal nga ekonomiya.
Gipasabot usab sa mayor nga mas epektibo ang mga programa alang sa agrikultura kung magkahiusa ang LGU,mga mag-uuma,pribadong sektor ug ubang organisasyon sa komunidad.
Samtang, si Leon B. Postigo Mayor Runie “BobbyJam” O. Jamora mipasalamat sa pagbisita ug partisipasyon ni Mayor Labadlabad sa maong kalihokan.
Sumala kang Mayor Jamora,usa kini ka oportunidad aron mas mapalig-on ang relasyon tali sa Leon B. Postigo ug Sindangan ug maablihan ang dugang nga mga convergence program nga mahimong ipatuman sa duha ka lokal nga panggamhanan.
Gilauman nga ang mas lig-on nga koordinasyon sa mga LGU makatabang sa pagpalapad sa mga inisyatibo alang sa agrikultura ug sa paghatag og dugang nga oportunidad sa mga mag-uuma sa Zamboanga del Norte.
Ang maong panagtambayayong nahiuyon sa tumong sa “Serbisyo GUgma” nga agenda ni Mayor Jamora alang sa mas serbisyo-sentradong lokal nga panggamhanan.(MEDALYN U. BORJA)
Source: Municipal Government of Leon B Postigo