Dipolog City – Usa ka pamilya sa Barangay Liwanag, Sergio Osmeña ang nakadawat og tabang pinaagi sa ‘Adopt a Family Program’ nga gipasiugdahan sa Zamboanga del Norte 1st Provincial Mobile Force Company. Tumong sa programa ang pagtabang sa mga pamilyang labing nanginahanglan sa komunidad.
Nadawat sa pamilya Atap ang usa ka wheelchair nga donasyon ni Roberto ‘Pinpin’ Uy Jr., lakip ang groceries, bugas, tambal ug vitamins nga gihatag sa Niño Anthony Ponce De Leon Medical Services and Pharmacy. Ang pito ka anyos nga si Gerald Atap adunay diperensya sa panglawas sukad pagkatawo ug nagkinahanglan og regular nga pag-atiman ug medikal nga suporta.
Gipasiugda sa 1st ZNPMFC nga ang maong programa kabahin sa ilang padayon nga inisyatiba sa pagserbisyo sa komunidad ilalom sa liderato ni Ryan Jay Capurcos. Gipaluyohan usab kini sa 1st ZNPMFC Advisory Group for Police Transformation and Development nga gipangulohan ni Cesar C. Bala.
Mipadayag og pasalamat ang mga opisyal sa Barangay Liwanag ug ang Rural Health Unit sa lungsod sa Sergio Osmeña sa mga nagpasiugda sa programa. Sumala sa barangay, dako kining tabang sa pamilya Atap ilabi na sa pagpadayon sa medikal nga pag-atiman kang Gerald.(JENIFFER JR. DELICA)
Source: Zamboanga del Norte Provincial News Network