Giaprobahan sa Sangguniang Panlalawigan sa Zamboanga del Norte ang pagtukod sa Solar-Powered Greenhouse Facility with Hydroponics System nga ipahimutang sa Provincial Agri-Industrial Center (PAIC) sa Upper Irasan, Roxas Zamboanga del Norte.
Ang proyekto adunay pundo nga ₱3 milyon ug ipatuman pinaagi sa Memorandum of Agreement tali sa Department of Agriculture (DA) Regional Office IX ug sa Provincial Government, diin gitugotan ang Gobernador nga si Darel Dexter T. Uy sa pagpirma sa MOA.
Gilauman nga ang pasilidad makatabang sa pagpalig-on sa agrikultura sa probinsya pinaagi sa mas episyente, limpyo, ug modernong pamaagi sa pagtanom gamit ang solar power ug hydroponics.
Sa laing bahin sa sesyon, giaprobahan usab sa SP ang promotional appointment ni Engr. Dioscoro G. Endab isip Provincial Government Department Head (Provincial General Services Officer).
Dugang pa, giendorso usab sa SP ang daghang kasabutan sa serbisyo sa pipila ka doktor nga gikuha sa probinsya aron mosuporta sa operasyon sa nagkalain-laing tambalanan ug Rural Health Units (RHUs) sa Zamboanga del Norte.(IKEN B. GULLEM)
Source: Zamboanga del Norte Provincial News Network