Gisugdan sa City Government of Dapitan, kauban ang Department of Environment and Natural Resources (DENR) Region IX, ang pagtukod sa Cluster 65 Protected Area Management Office (PAMO) Building sa Dapitan Aqua Marine Park sa Barangay Banonong, isip lakang sa pagpalig-on sa pagdumala ug pagpanalipod sa kalikupan.
Ang groundbreaking ceremony nagtimaan sa lig-on nga panaghiusa sa lokal nga pangagamhanan ug DENR aron mas mapalambo ang environmental governance, ilabina sa pagdumala sa protected areas ug malungtarong paggamit sa natural nga kahinguhaan. Gilauman nga ang PAMO Building magsilbing sentro sa koordinasyon sa mga programa ug kalihukan nga nagpunting sa pagpanalipod sa kadagatan ug baybayon sa Dapitan.
Gipahayag sa City Government sa Dapitan nga ang maong inisyatiba usa ka pamatuod sa ilang padayon nga komitment sa pag-atiman sa kinaiyahan, aron masiguro ang kalig-on sa marine ug coastal ecosystems alang sa kasamtangan ug umaabot nga henerasyon.(IKEN B. GULLEM)
Source: City Government of Dapitan
