Sentro sa pirmahanay sa Memorandum of Agreement (MOA) sa “Tara, Basa! Tutoring Program 2026” ang tin-aw nga misyon: sulbaron ang padayon nga kakulangan sa pagbasa sa mga kabataan pinaagi sa kusog sa komunidad ug kabatan-onang tutors.
Gipahigayon ang kakihokan sa amphitheater sa New Government Center, diin gipakita ang panaghiusa sa nagkadaiyang sektor alang sa edukasyon.
Gipangunahan sa Department of Social Welfare and Development (DSWD) ang inisyatibo, uban sa panagtambayayong sa City Government of Dapitan, Jose Rizal Memorial State University (JRMSU), ug Department of Education (DepEd). Gitambongan ang pirmahanay sa mga lokal nga opisyal lakip si Mayor Evelyn T. Uy ug mga representante sa edukasyon, nga nagpalig-on sa koordinasyon sa implementasyon sa programa.
Laing pamaagi ang gidala sa programa—dili lang classroom-based learning, kundili community-driven tutoring. Ang mga estudyante sa kolehiyo himuon nga tutors aron motabang sa elementary learners nga naglisod sa pagbasa, pinaagi sa tutok nga sessions, community assemblies, ug capability building. Apil usab sa programa ang cash-for-training ug cash-for-work nga benepisyo alang sa mga tutors.
Sumala sa lokal nga panggamhanan, ang maong inisyatibo dili lang pagpauswag sa reading skills kondili paghatag usab og dugang oportunidad sa kabatan-onan. Gilauman nga pinaagi sa lig-on nga panagtambayayong sa gobyerno, eskwelahan, ug komunidad, masiguro nga walay batang mapabilin sa pagkat-on sa Dapitan.(IKEN B. GULLEM)
Source: Zamboanga del Norte Provincial News Network