Mihatag og otoridad ang Sangguniang Panlalawigan (SP) sa Zamboanga del Norte kang Gobernador Darel Dexter T. Uy aron mopirma og Memorandum of Agreement (MOA) tali sa Department of Education (DepEd) ug Department of Agriculture – Regional Field Office IX (DA-RFO IX) atol sa ilang regular session kaniadtong Pebrero 2.
Ang MOA sa DepEd nagtumong sa implementasyon sa Basic Education Facilities Program, nga naglakip sa pagpangtukod og mga school building sa mga lugar nga kulang og classroom. Ilalum sa kasabutan, ang probinsya maoy mangulo sa procurement ug construction samtang ang DepEd mohatag og pondo ug technical support aron masiguro ang kalidad sa proyekto.
Samtang, ang MOA tali sa probinsya ug DA-RFO IX naghatag og kahigayonan nga makabenepisyo ang Zamboanga del Norte sa Livestock Program, lakip na ang pondo alang sa usa ka Mobile Veterinary Clinic nga gamiton sa Provincial Veterinarian isip veterinary service provider.
Gihatagan usab og pagtugot ang gobernador sa pagpirma sa mga Contracts of Service sa mga personahe nga na-assign sa Opisina sa Gobernador alang sa unom ka bulan, gikan Enero 5 hangtod Hunyo 30, 2026.
Dugang pa, giaprobahan sa SP ang resolusyon nga nagtugot kang Gov. Uy sa pagpirma sa mga kontrata sa mga doktor ug medical specialists nga na-assign sa Zamboanga del Norte Medical Center (ZNMC) ug ubang mga tambalanan sa probinsya.(IKEN B. GULLEM)
Source: Zamboanga del Norte Provincial News Network