Gipahigayon sa Provincial Government of Agusan del Sur (PGAS) uban sa probinsyal nga nga pangagamhanan sa Zamboanga del Norte, ang usa ka miting aron tutukan ang pag-reinstall sa Local Government Information System (LGIS) isip kabahin sa paningkamot niini sa pagpalig-on sa digitalization ug pagpaayo sa paghatag og serbisyo publiko.
Gipangulohan ang panagtigom ni Provincial Legal Officer Atty. Edwin Prince I. Gonzales, uban ang pagtambong sa mga miyembro sa komite ug sa PGAS Technical Team. Gituki sa miting ang kahimtangan sa LGIS ug ang mga lakang alang sa pagbalik-implementar niini sa sistema sa probinsya.
Kahinumdoman nga adunay Memorandum of Agreement tali sa PGAS ug Provincial Government of Zamboanga del Norte nga nagtugot sa paggamit sa LGIS. Ubos sa kasabutan, ang PGAS maoy naghatag sa software, teknikal nga pagbansay ug konsultasyon, samtang ang kauban nga probinsya maoy responsable sa pasilidad, hardware ug personnel alang sa implementasyon sa sistema.
Pinaagi sa pag-reinstall sa LGIS, gilauman nga mas mapalig-on ang transparency, accountability ug maayong pagdumala sa probinsya. Gilauman usab nga kini makatabang sa pagpadali sa mga transaksiyon sa publiko ug pagpalig-on sa data-driven governance.
Kini nga lakang nagpakita sa tinguha sa PGAS ilawom sa liderato ni Governor Darel Dexter T. Uy nga ipahiangay ang modernong teknolohiya sa lokal nga pangagamhanan aron mas organisado, episyente ug responsive ang serbisyo alang sa katawhan.(IKEN B. GULLEM)
Source: Zamboanga del Norte Provincial News Network