Gipahigayon sa Katipunan Municipal Police Station ang usa ka dayalogo ug pagpang-apod-apod og flyers sa mga residente sa Barangay Uno, Katipunan, Zamboanga del Norte isip kabahin sa ilang kampanya sa pagpalig-on sa kalinaw ug kahusay sa komunidad.
Ang kalihokan gipangulohan ni PSSg Geppryl Vincent R. Tidor, patroller, ubos sa pagdumala ni PCPT Rommel John B. Sabas, Officer-In-Charge.
Tumong niini ang paghatag og impormasyon ug kahibalo sa katawhan mahitungod sa mga pamaagi sa paglikay sa krimen ug sa hustong pakig-uban sa kapulisan. Matod pa sa kapulisan, pinaagi sa dayalogo, mas dali nilang madungog ang mga kabalaka sa komunidad ug mahatagan dayon og tubag ang mga pangutana sa katawhan.
Ang mga flyers nga gipanghatag naglangkob sa mga pahimangno ug tips sa kaluwasan, lakip ang crime prevention ug pagreport sa mga kahina-hinalang kalihokan.(IKEN B. GULLEM)
Source: Katipunan Municipal Police Station