Napuno sa kasikas ang social media post ni Dodoy Corpus human siya nagreklamo sa iyang kasinatian sa Rural Health Unit (RHU) Roxas may kalabotan sa pagpa-inject kontra rabies sa iyang anak nga napaakan sa iro.
Sumala kang Corpus, Lunes pa sila miduol sa RHU aron magpa-inject apan Birnes na sila naasikaso. Iyang giingon nga tungod sa kalawom sa iyang kabalaka isip ginikanan, gibati niya nga wala dayon nahatagan og hustong pagtagad ang sitwasyon sa iyang anak, hinungdan nga iyang gipadayag ang iyang kasagmuyo sa social media ug nangayo og aksyon gikan sa mga responsable.
Sa pahayag ni Dr. Christian Atienza, Municipal Health Officer ug Head sa RHU Roxas, gipasabot niya nga limitado ang manpower ug resources sa maong pasilidad. Matod niya, dili bukas ang RHU kada Sabado ug Domingo ug scheduled ang Anti-Rabies Vaccination (ABTC) sa nagkalain-laing barangay sama sa Manukan, Lalibertad, Corazon ug Zanorte, hinungdan nga dili kini mahimong i-operate matag-adlaw.
Tungod niini, gitambagan ni Dr. Atienza ang pamilya nga modiretso sa Dr. Jose B. Lingad Memorial Hospital (DJRMH), diin bukas pa ang ABTC sa maong higayon. Iyang gidugang nga human sa sunod nga dose, ang pasyente mahimo nang i-coordinate balik sa RHU Roxas para sa sunod nga schedule.
Gipasiguro sa RHU nga andam gihapon silang motabang ug bukas sa komunikasyon aron matubag ang kabalaka sa publiko, samtang ang insidente nagpasiugda sa kahimtangan sa mga public health facility nga nag-atubang og limitadong resources ug dako nga panginahanglan sa komunidad.(IKEN B. GULLEM)