Dakpan sa kapulisan ang usa ka 21 anyos nga lalaki human masikop sa gilusad nga drug buy-bust operation sa Purok Madaiton, Brgy. Lingasad, lungsod sa Polanco, Zamboanga del Norte, kaniadtong miaging adlaw.
Giila sa kapulisan ang dinakpan nga si alyas “Ray,” ulitawo ug residente sa nasangpit nga lugar.
Nasakmit gikan kaniya ang usa ka gamay nga pakete sa ginadiling drugang shabu nga nagsilbing buy-bust item ug ang ₱1,000 nga gigamit isip buy-bust money.
Dugang pa, narekober usab sa mga operatiba ang lima pa ka gagmayng pakete sa shabu ug usa ka smartphone gikan sa iyang pagdumala. Sumala sa kapulisan, mokabat sa tulo ka gramos ang tanang narekober nga shabu nga gibanabanaang kantidad nga ₱20,000.
Karon, detinado na ang suspek sa Polanco Municipal Police Station ug mag-atubang sa kasong paglapas sa Republic Act 9165 o ang Comprehensive Dangerous Drugs Act of 2002.(IKEN B. GULLEM)
Source: Media Outlets