Gipadayag sa World Vision Philippines ang ilang tinguha nga palapdan ang kooperasyon sa provincial government sa Zamboanga del Norte aron mapalig-on ang mga programa alang sa kaayohan sa kabataan.
Atol sa courtesy call kang Gobernador Darel Dexter Uy, gipasalig sa World Vision ang padayon nga pakigtambayayong sa lalawigan, ilabi na sa mga inisyatiba nga nagtumong sa proteksyon, kahimsog, edukasyon, ug kaluwasan sa mga bata.
Human sa panagtagbo, gipahigayon ang Stakeholders’ Meeting nga gitambongan sa mga opisyal sa probinsya lakip ang Provincial Disaster Risk Reduction and Management Office, Provincial Planning and Development Office, Provincial Health Office, ug Provincial Social Welfare and Development Office, kauban ang mga Municipal Social Welfare and Development Officers.
Sa maong miting, gihisgutan ang mga plano sa World Vision Philippines nga ipalapad ang ilang community-based programs sa Zamboanga del Norte isip kabahin sa mas lapad nga inisyatiba sa Mindanao.
Sa pagkakaron, nagpadayon na ang mga programa sa Siayan, ug gilauman nga masudlan usab ang Polanco, Piñan, Katipunan, Rizal, ug Dapitan City, isip kabahin sa paningkamot sa pagpalig-on sa usa ka luwas ug malungtarong kaugmaon alang sa kabataan sa lalawigan.(IKEN B. GULLEM)
Source: Zamboanga del Norte Provincial News Network